വധശിക്ഷ

എനിക്കൊരാളെക്കൊല്ലണ-
മതിനെന്തെളുപ്പമാര്‍ഗ്ഗം
തിരഞ്ഞു ഞാന്‍
കഴുത്ത് ഞെക്കിപ്പിടിക്കുക
കൈവിഷംകൊടുത്തേയൊടുക്കുക
പതുക്കിവച്ചൊരു കഠാര
കൈപ്പിടി-
വരേയ്ക്കുമുള്ളില്‍കൊരുക്കുക..?
എനിക്കൊരാളെക്കൊല്ലണ-
മവനോടടുത്തു സ്നേഹം
നടിച്ചു ഞാന്‍....

സ്വാമിയേ ...അശരണം

നിര്‍വചനം

മിത്രമേ മിടിക്കുന്ന
ഹൃദയം തുരക്കുക
കാണാതെ വന്നെന്‍ കാതില്‍
കാരീയമിറ്റിക്കുക
എപ്പൊഴും നിഴലായെ-
ന്നൊപ്പമേ നടക്കുക
കണ്ണിന്റെ തിളക്കങ്ങള്‍
കട്ടു നീ കതിര്‍ക്കുക
നാവിന്മേല്‍ പാഷാണത്തിന്‍
പാരുഷ്യം പുരട്ടുക
ഉറ്റവന്‍ ഞാനെന്നാലു-
മൊറ്റു നീ കൊടുക്കുക
പാപത്തിന്‍ പണംകൊണ്ട്
പാനോപചാരം ചെയ്ക..
മിത്രമാണെന്നാലും നീ
സ്നേഹിക്കുന്നുമുണ്ടാവാം
അല്ലെങ്കിലെല്ലായ്പോഴും
നിഴലായ് നടക്കുമോ..

അവസ്ഥ

നഖമുനകള്‍ക്ക് മുറുക്കം പോരാ

നാവിന്

ശാപമെരുക്കം പോരാ

കണ്ണിനപരനിലെ ദോഷം-

കാണാനുള്ള വഴക്കം പോരാ

കുറ്റമൊളിക്കാനറിയില്ല,കരള്‍-

കൊത്തിനുറുക്കാനാവില്ല

പിന്നെങ്ങനെ ഞാനൊരു കവിയാകും

കൃതി-

യെങ്ങനെപിറവിയെടുക്കും...

ഏണി

നാലുചുറ്റും ചുമരുകള്‍ക്കുള്ളില്‍ ഞാന്‍
ഭീതിയേറും മുഖവുമായ് പിന്നില്‍ നീ

കണ്ണിലെന്തൊരു ദൈന്യത!മിത്രമേ

ഒറ്റയായുപേക്ഷിക്കില്ല നിന്നെ ഞാന്‍...

ചുറ്റുവന്‍മതില്‍ മേലെ നീലാകാശ-

മെത്രനക്ഷത്രമെത്രതേജോമയം

പുഞ്ചിരിക്കയാണിപ്പൊഴും വര്‍ഷങ്ങള്‍-

ക്കെത്രമുന്‍പേ പൊലിഞ്ഞതാണെങ്കിലും

അപ്പുറത്തെത്തിനോക്കുംനിഴലുകള്‍-

ക്കൊപ്പമെത്താനെനിക്കില്ല കൌതുകം

മിന്നിമായും മിനുക്കങ്ങള്‍ കണ്ടുനീ

കണ്‍ മിഴിക്കേ തപിച്ചുപോകുന്നു ഞാന്‍

രക്ഷയൊറ്റയ്ക്ക് ഞാന്‍ ,നീ-യനര്‍ഹന്റെ

നിത്യജീവനം നീതിയാം കാലമേ

ഒറ്റുകിട്ടുവാന്‍ നേരമായ് സ്നേഹിതര്‍-

കാത്തുനില്‍ക്കുന്നതെന്നെയോനിന്നെയോ

ഈയിരുട്ടിന്നിടത്തരം നീതിയില്‍

നേര്പാതിയും കാണാതിരിക്കിലും

തീ പിടിക്കും നടുക്കങ്ങള്‍ പോലെ നിന്‍

നെഞ്ചിടിക്കും തുടിപ്പുകള്‍ കേള്‍പ്പുഞാന്‍

വാരിയെല്ലു വലിച്ചൂരിനേരിന്റെ

കാരമുള്ളിനാല്‍ കോര്‍ത്തൂപരസ്പരം

ചാരിവയ്ക്കുന്നു സ്നേഹമണ്‍ ഭിത്തിയില്‍

കാലുവെയ്ക്കുക കയ്യേണിയാണു ഞാന്‍...

ആരണ്യകം

കൈതവാരണ്യങ്ങളില്‍ നടന്നെന്‍ കാലു-
മെന്‍ കരള്‍പ്പൂവും മുറിഞ്ഞു
കണ്ടകമാരികള്‍ പെയ്തുവീണെന്‍ മെയ്യു-
മേതോ കിളിയും പിടഞ്ഞു
എത്ര കിനാവുകള്‍ നഷ്ടം സമാശ്വാസ-
മേകുവാനല്ല പഴിക്കുവാനിഷ്ടം
ഹരണം കഴിഞ്ഞു കണക്കുനോക്കുമ്പോള്‍
വ്രണിതമീ ജീവിതം ശിഷ്ടം
ഗ്രഹണത്തിനേതു താളം,തീപിടിക്കുന്ന
വ്യര്‍ത്ഥമെന്‍ ചിന്തയ്ക്കു രാഹുകാലം
സര്‍ഗശക്തിക്കു പ്രവാസം,വരണ്ടെത്തി-
നോക്കും നിലാവിന്നു സന്നിപാതം
എണ്ണിയടുക്കാന്‍ തുടങ്ങവേ കൈവിട്ടു-
മണ്ണിലൊടുങ്ങിക്കിതയ്ക്കും സുഖാന്ത്യങ്ങള്‍
പിന്നിട്ടപാതയിലൊക്കെയുമക്കങ്ങള്‍-
ചൂടും ദുരന്തദൂരംചൂണ്ടിക്കല്ലുകള്‍
‍പോകുവാന്‍ നേരായ പാതയേത്,നേരു-
കാട്ടുവന്‍ പോന്നവന്‍ പോയതെങ്ങ്....
കൈതവാരണ്യങ്ങളില്‍ നടന്നെന്‍ കാലു-
മെന്‍ കരള്‍പ്പൂവും മുറിഞ്ഞു
കണ്ടകമാരികള്‍ പെയ്തുവീണെന്‍ മെയ്യു-
മേതോകിളിയും പിടഞ്ഞു....

കടല്‍ജന്മം

പെരിയ മീനുകള്‍ പോരാടിനേടുമുള്‍-

ക്കടലിലാണെന്റെ ജീവിതം.

നേര്‍ക്കുനേര്‍-

പൊരുതിനില്‍ക്കാനുടല്‍ക്കരുത്തില്ലാത്തൊ-

രുരിയ ജന്മം,നിരന്വയം,നിര്‍മമം..

കരയിലേറിയും ,തേറിയും ഉള്ളിലൂ-

ടെരിയുമേതോ പൊരിത്തീ പടര്‍ത്തിയും

നുരയൊടുങ്ങാ കലിപ്പുറത്തേറുമി-

ത്തിരയിലങ്ങിങ്ങു പായുകയാണു ഞാ‍ന്‍..